Парафіяльны фэст глыбачане адзначылі разам з біскупам Юзафам Станеўскім (+відэа)

  • Друкаваць
Падрабязнасці
Апублікавана 29.05.2018 00:56

fest 2527 мая вернікі Глыбокага адзначылі парафіяльны фэст у гонар Найсвяцейшай Тройцы, якога з нецярпеннем кожны год чакаюць. Урачыстую святую Імшу ўзначаліў дапаможны біскуп Гродзенскай дыяцэзіі Юзаф Станеўскі. Прыбылі таксама святары з дзеканату і іншых парафій, большая частка якіх несла паслугу ў сакраманце пакуты ў канфесіяналах. 

Біскуп Юзаф у 1991 годзе адбываў практыку ў Мосары, як клерык пасля 1 курса семінарыі, пад душпастырскай апекай святой памяці ксяндза пралата Юзафа Булькі. Таму гэта старана яму вельмі блізкія. Іерарх падзяліўся, што з вялікім задавальненнем прыбыў у Глыбокае, бо часта вяртаецца ў сваіх думках да гэтай стараны, дзе вера хрысціянская захавалася ў нашых сэрцах і была перададзена маладому пакаленню. “І сёння з вялікай радасцю хачу падзякаваць Богу ў Тройцы Адзінай за вашу веру, прысутнасць, жыццё касцёлам”, - адзначыў Гродзенскі біскуп.
Падчас Эўхарыстыі высокі госць асаблівым чынам маліўся і прасіў бласлаўлення Святой Тройцы для моладзі, якая здае экзамены і тэсты.
У Імя Айца і Сына, і Духа Святога… Найсвяцейшая Тройца - штодня ўзгадваем яе ў знаку крыжа, калі распачынаем новы дзень, новы буханак хлеба, працу, навуку. Прызываючы Іх прысутнасць, тым самым спаўняем волю Хрыста, які наказваў Апосталам “ідзіце і абвяшчайце, ідзіце і хрысціце ў Імя Айца, і Сына і Духа Святога”. Вандроўка чалавека дарогай Божай распачынаецца праз дар жыцця. Бог кліча нас да жыцця праз любоў да нашых бацькоў, а яны гэты вялікі дар прымаюць, затым стараюцца, каб ён развіваўся не толькі ў вачах людзей, але і вачах Бога. Таму просяць аб Святым Хросце, дзе святар упершыню “знаёміць” немаўля са Святой Тройцай.

У мінулую нядзелю адзначалі ўрачыстасць Спаслання Духа Святога. Бо як казаў Езус: “Трэба вам моцы з высока”. Тое, што ведаем катэхізіс, што чытаем Святое Пісанне, ведаем малітвы і песні - гэта веды, але патрэбны ўчынкі. На прыкладзе Св. Пятра можа бачыць, якая моц з вышыні яго наталіла і ўмацавала, што ён не баяўся праліць крыві і аддаць свайго жыцця за Езуса Хрыста.
Біскуп падзяліўся прыкладам са свайго жыцця, які здарыўся ў Гродзенскай катэдры ў 1976 годзе. Са старэйшай сястрой паехаў у жніўні ва ўнівермаг, каб купіць школьныя прылады. Але бацькі сказалі, каб схадзілі ў касцёл, бо было Марыйнае свята. Падышлі да катэдры, вялікі прыгожы касцёл быў адчынены. Дзеці тады не ведалі, што гэта быў музей. Увайшоўшы і ўкленчыўшы ў бочнай наве ля абраза Маці Божай Кангрэгацкай, пачалі маліцца. Затым падышоў да іх старэйшы мужчыны і сказаў: “Сыходзьце, дзеці, адсюль. Тут няма вашага бога”. “У касцёле, пабудаваным рукой веруючага чалавека, прызначанага для малітваў і сустрэчы Бога з чалавекам, мы пачулі, што Бога няма. Не звяртаючы вялікай увагі на гэтыя словы, дома з радасцю распавядалі маці, што купілі, а толькі тата запытаў: “Ці былі ў касцёле?” Распавёўшы гэты момант бацьку, памятаю і сёння першую яго катэхезу, якая запала глыбока ў сэрцы. Як звычайны просты чалавек змог растлумачыць аб прысутнасці Бога ў маім сэрцы”, - звярнуў увагу біскуп Юзаф.
На заканчэнне гаміліі іерарх заклікаў у размовах з іншым чалавекам пакрыху дадаваць Евангелле. Няхай будзе па аднаму слову кожны дзень, не ўсе адразу, але прыбраць плёткі, нараканні. Мы павінны ўмець пераадолець усе цяжкасці і стаць на дарогу Божую, дзе Ён ідзе перад намі, дзе чакае нас у радасці, дзе мы спазнаем Тройцу Святую, калі ўбачым Бога тварам у твар.
Пасля Эўхарыстыі словы падзякі за супольную малітву і прамоўленае слова былі скіраваны Яго Эксцэленцыі біскупу Юзафу ад глыбоцкіх парафіян.


Пасля святой Імшы адбылася Эўхарыстычная працэсія. Усе святары, сёстры законныя і вернікі пад гукі звона выйшлі з касцёла, каб падзяліцца з жыхарамі Глыбокага сваёй святочнай радасцю.
На заканчэнне ўрачыстасці біскуп Юзаф падзяліўся сваім уражаннем прыгажосці веры парафіі і падзякаваў за запрашэнне, за магчымасць праслаўляць Бога ў Тройцы Адзінага разам з глыбоцкімі вернікамі, пачынаючы ад найменшых на руках у бацькоў. «Будзьце моцнымі ў веры і праўдзе аб змёртвыхпаўстанні Езуса Хрыста, аб нашай надзеі і любові да Бога і чалавека», - пажадаў на развітанне іерарх.

Больш фота ў суполцы ВК>>