StrinitaS - Удзел нашай моладзі ў 30 Міжнароднай парафіядзе ў Варшаве і двухтыднёвы адпачынак на моры

Удзел нашай моладзі ў 30 Міжнароднай парафіядзе ў Варшаве і двухтыднёвы адпачынак на моры

Падрабязнасці: Апублікавана 29.07.2018 18:37

У выніку перамогі ў ІІІ Парафіядзе дзяцей і моладзі Віцебскай дыяцэзіі ў мінулым годзе, прадстаўнікі глыбоцкай парафіі атрымалі ў падарунак удзел у 30 Міжнароднай парафіядзе ў Варшаве і двухтыднёвы адпачынак у Польшчы.

7 ліпеня 15 маладых людзей з Глыбокага разам з апекунамі Марынай Сінкевіч і Леанідай Янаўнай Зеваліч паехалі ў Варшаву, дзе прайшлі рэгістрацыю і пасяліліся ў студэнцкім інтэрнаце. У нядзелю, 8 ліпеня адбылося ўрачыстае адкрыццё 30 Міжнароднай парафіяды на варшаўскіх Сякерках у Санктуарыі Маці Божай Настаўніцы моладзі.

“Парафіяда - ідэальны час, каб праверыць сябе. Але каб пераканацца ў гэтым, патрэбен шаблон, святло. Гэтае святло Езус”, - з гэтымі словамі біскуп Марыян Флорчык, дэлегат канферэнцыі польскага епіскапату, душпастыр спартоўцаў заклікаў аўдыторыю да поўнага і плённага перажывання пачатка Парафіяды.

З панядзелка распачаліся спаборніцтвы ў трох намінацыях: стадыён, святыня, тэатр. Кожны дзень распачынаўся святой Імшой. На працягу дня праходзілі розныя спаборніцтвы, конкурсы, заняткі, а перад вячэрай было ўзнагароджванне за бягучы дзень. Узнагароды былі ў трох узроставых катэгорыях, а таксама апекуны паміж сабой спаборнічалі ў розных відах спорту. Чарговы дзень заканчваўся інтэграцыйным вечарам і супольнай малітвай.

warszawa parafiada 06

Урачыстае закрыццё Парафіяды адбылося 13 ліпеня, падчас якой па агульнай суме набраных балаў былі вызначаны дзве лепшыя каманды: Даліна (Украіна) і Ольштын (Польшча). Затым усе ўдзельнікі прайшлі вялікай калонай ад Кампуса да касцёла Провіду Божага, дзе пахаваны а. Юзаф Ёнц SP, заснавальнік Парафіяды. У гэтай святыні адбылася ўрачыстая св. Імша на заканчэнне.

30 Міжнародная парафіяда ў лічбах:

7 краін (Беларусь, Расія, Украіна, Літва, Латвія, Германія, Польшча),
1491 удзельнік,
1150 канкурсантаў і 170 апекуноў,
56 замежных і 31 польская каманды;
80 валанцёраў.

Прадстаўнікі Віцебскай дыяцэзіі занялі 7 прызавых месцаў:

Кацярына Рабкоўская – 1 месца – шахматы (дзяўчаты, сярэдняя ўзроставая катэгорыя);
Кацярына Рабкоўская – 1 месца – шашкі (дзяўчаты, сярэдняя ўзроставая катэгорыя);
Марыя Іваноўская – 1 месца — летні біятлон (дзяўчаты, сярэдняя ўзроставая катэгорыя);
Марыя Іваноўская – 2 месца — стральба (дзяўчаты, сярэдняя ўзроставая катэгорыя);
Дар'я Іваноўская – 2 месца — конкурс малюнка “Дары Духа Святога” (сярэдняя ўзроставая катэгорыя);
Марына Сінкевіч – 1 месца – кіданне мяча (жанчыны, апекуны).
Марына Сінкевіч – 1 месца – штурханне ядра (жанчыны, апекуны).

Трэба адзначыць, што глыбоцкія хлопцы і дзяўчаты актыўна прымалі ўдзел у розных конкурсах і спаборніцтвах, а калі не займалі прызавыя месцы, то ў 10-ку лепшых уваходзілі і паказвалі добры вынік:

Марыя Іваноўская – 4 месца – кіданне мяча (дзяўчаты, сярэдняя ўзроставая катэгорыя);
Даніла Рудак – 5 месца – кіданне мяча (хлопцы, сярэдняя ўзроставая катэгорыя);
Яўген Высоцкі – 4 месца – шахматы (хлопцы, старэйшая ўзроставая катэгорыя);
Яўген Высоцкі – 6 месца – спартыўнае арыентаванне (хлопцы, старэйшая ўзроставая катэгорыя);
Вольга Пісарэнка – 8 месца – спартыўнае арыентаванне (дзяўчаты, сярэдняя ўзроставая катэгорыя);
Анастасія Вярэга – 8 месца – стральба (дзяўчаты, старэйшая ўзроставая катэгорыя).
Марына Сінкевіч – 8 месца – стральба (жанчыны, апекуны)

Пасля Парафіяды юныя глыбачане накіраваліся на двухтыднёвы адпачынак у Лэбу, што на Балтыйскім моры. Летнік праходзіў пад дэвізам “Яднае нас Польшча”. У доме адпачынку разам адпачывалі 6 груп: Мінск, Глыбокае, Санкт-Пецярбург, Міцкуны (Літва), Стары Тракай (Літва), Лентварыс (Літва), у агульнай колькасці 102 асобы. На гэтыя два тыдні была падрыхтаваная адмысловая праграма: праходзілі заняткі па вывучэнню польскай мовы, прагулка на караблі па моры, сплыў на байдарках, “знаёмства” з марскімі коцікамі і марскімі львамі, пейнтбол, сустрэча з Маршалам Сената Польшчы Станіславам Карчэўскім і кіраўніцтвам Парафіяды.

warszawa parafiada 36