“Вы – радасць Касцёла”: ураджэнец Глыбокага кс. Антоній Тышко прыняў святарскае пасвячэнне ў Віцебску
- Падрабязнасці
- Апублікавана 02.05.2026 22:56
У апошні дзень тыдня Добрага Пастыра, 2 мая 2026 года, у катэдральным касцёле Езуса Міласэрнага ў Віцебску адбылася падзея, якая напоўніла радасцю ўсю Віцебскую дыяцэзію. Два дыяканы –Антоній Тышко, родам з нашага Глыбокага, і Андрэй Януль з Пагошчы – прынялі сакрамант прэзбітэрскага пасвячэння. Урачыстую Імшу ўзначаліў біскуп Алег Буткевіч.
Радасць, якая аб’ядноўвае нябёсы і зямлю
Стаць сведкамі гэтай падзеі, павіншаваць і памаліцца за новых святароў прыехала мноства вернікаў з розных куткоў дыяцэзіі. Сама прырода, здавалася, падкрэслівала ўрачыстасць: упершыню за некалькі тыдняў суцішыўся буйны вецер, і вуліцы напоўніліся пахам надыходзячага лета.
– Дзякуем Богу за дар жыцця і пакліканне гэтых дыяканаў, якія сёння ўвойдуць у прэзбітэрый Віцебскага Касцёла, – сказаў біскуп Алег на пачатку святой Імшы. Ён асабліва прывітаў бацькоў і родных дыяканаў, а таксама шматлікіх святароў, сярод якіх былі кс. прал. Францішак Кісель, кс. кан. Дзмітрый Пухальскі, канцлер дыяцэзіі кс. кан. Віктар Місевіч, рэктар семінарыі кс. Ян Раманоўскі.
“Будзьце другім Хрыстом” – настаўленне біскупа
Падчас гаміліі біскуп Алег нагадаў пра сутнасць святарства: праз хрост кожны з нас уваходзіць у каралеўскае святарства, але некаторых Бог выбірае для асаблівай паслугі, каб стаць Alter Christus – другім Хрыстом.
– Сёння мы пасвячаем нашых братоў Антона і Андрэя – маладых людзей, якія не толькі пачулі заклік Хрыста, але і мелі адвагу сказаць Яму «так». Гэта для Касцёла на Віцебшчыне вялікая радасць, – звярнуўся да вернікаў біскуп.
А да самых кандыдатаў іерарх сказаў: “Гэта не будзе проста. Сённяшні дзень – толькі пачатак. Свет заўсёды будзе прапаноўваць вам штосьці больш выгоднае, але, зайшоўшы за гэтым далёка, можна страціць дар Божага паклікання. Майце давер да Бога і бярыце прыклад са святых нашай зямлі”.
Абрад, які аб’ядноўвае пакаленні
Падчас літургіі адбыўся сакрамантальны абрад: кандыдаты выказалі жаданне быць пасвечанымі, склалі абяцанне паслухмянасці біскупу. Прагучала Літанія да ўсіх святых. Біскуп усклаў рукі на кожнага з іх, а затым тое ж самае зрабілі ўсе прысутныя святары – доўгая чарга ксяндзоў выстройвалася, каб прыняць новых братоў у прэзбітэрскую супольнасць.
Новавысвечаныя святары апранулі стулу і арнат, былі намашчаныя алеем і атрымалі з рук біскупа хлеб і віно. Завяршыўся абрад брацкімі абдымкамі з біскупам і ўсімі святарамі.
Падзякі і першыя прызначэнні
У канцы Імшы кс. Антоній і кс. Андрэй падзякавалі сваім бацькам, пробашчам, семінарыстам, прафесарам і рэктару. Асаблівыя словы ўдзячнасці яны скіравалі біскупу Алегу за ўдзелены сакрамант.
Канцлер дыяцэзіі кс. кан. Віктар Місевіч перадаў святарам пасведчанні аб пасвячэнні і абвясціў месцы іх служэння:
– кс. Антоній Тышко (наш зямляк!) прызначаны вікарыем у парафію св. Андрэя Баболі ў Полацку і парафію св. Язафата Кунцэвіча ў Расонах.
– кс. Андрэй Януль скіраваны вікарыем у парафію Святой Тройцы ў Глыбокім.
Так, наш родны глыбоцкі касцёл таксама атрымаў новага святара – ксяндза Андрэя, за што мы ўдзячныя Богу. А за ксяндза Антонія, які вырас на нашай зямлі, мы будзем маліцца, каб яго служэнне ў Полацку і Расонах прыносіла багаты плён.
Заклік да маладых
– Сёння мы сведкі вялікай радаснай падзеі, – падсумаваў біскуп Алег. – Звяртаюся да маладых людзей, якія чуюць Божы голас: будзьце адважнымі!
Ардынарый падзякаваў арганізатарам – кс. Валерыю Марціноўскаму і кс. Генадзію Рэйшэлю, хору і міністрантам, а таксама бацькам новых святароў, заахвоціўшы іх да яшчэ большай малітвы за сваіх сыноў.
Парафіяне Глыбокага з хваляваннем чакаюць першай святой Імшы кс. Андрэя Януля ў нашым касцёле, а ксяндзу Антонію абяцаюць падтрымку малітвай на яго няпростай, але благаслаўлёнай святарскай дарозе.
Віншуем і молімся!
